एनआईटी सिक्किमले 21 नोभेम्बरमा राभाङ्लामा आफ्नो नवौँ दीक्षान्त समारोह आयोजन गर्ने
एनआईटी सिक्किमले 21 नोभेम्बरमा राभाङ्लामा आफ्नो नवौँ दीक्षान्त समारोह आयोजन गर्ने


गान्तोक, 19 नोभेम्बर (हि.स.)। नेशनल इन्स्टिट्युट अफ् टेक्नोलोजी (एनआईटी) सिक्किमले आगामी 21 नोभेम्बर, 2026 मा राभाङ्लास्थित तथागत सल (बुद्ध पार्क) मा आफ्नो नवौँ दीक्षान्त समारोह आयोजन गर्ने भएको छ। यस समारोहमा 2026 को स्नातक ब्याचको शैक्षिक उपलब्धिलाई मनाइनेछ र विभिन्न विधाका विद्यार्थीहरूलाई उपाधि (डिग्री) प्रदान गरिनेछ। उक्त जानकारी आज पीआईबीले विज्ञप्तिमा दिएको छ।

यस अवसरमा शिक्षा मन्त्री राजु बस्नेत मुख्य अतिथिका रूपमा उपस्थित रहनेछन्। सिक्किमका लोकसभा सांसद डा. इन्द्रहाङ सुब्बा विशिष्ट अतिथिका रूपमा सहभागी हुनेछन्। एनआईटी सिक्किमको बोर्ड अफ् गभर्नर्सका अध्यक्ष रमेश कुमार सरावगीले समारोहको अध्यक्षता गर्नेछन्।

एनआईटी सिक्किमका निर्देशक प्रा. महेश चन्द्र गोभिलले संस्थाको वार्षिक प्रतिवेदन प्रस्तुत गर्नेछन्, जसमा गत वर्षका प्रमुख उपलब्धि र विकासक्रमहरू समेटिनेछन्।

यस वर्ष संस्थाले 18 जना पीएचडी शोधार्थी, 18 जना एमटेक, 14 जना एमएससी, एकजना स्नातकोत्तर डिप्लोमा र 145 जना बीटेक स्नातकहरूलाई उपाधि प्रदान गर्नेछ। उत्कृष्ट शैक्षिक प्रदर्शनको कदर गर्दै विभिन्न विधामा नौवटा स्वर्ण पदक पनि प्रदान गरिनेछ।

भारत सरकारको शिक्षा मन्त्रालय अन्तर्गत राष्ट्रिय महत्त्वको संस्थाका रूपमा सन् 2010 मा स्थापित एनआईटी सिक्किमले शैक्षिक क्षेत्र, अनुसन्धान र सामुदायिक पहुँचका आयामहरूमा निरन्तर प्रगति गर्दै आएको छ। यो संस्था उत्कृष्टताको संस्कृतिलाई प्रवर्द्धन गर्न तथा गुणस्तरीय शिक्षा र प्रभावकारी अनुसन्धानका माध्यमबाट राष्ट्रिय विकासमा अर्थपूर्ण योगदान पुऱ्याउन प्रतिबद्ध रहेको बताइएको छ।

---------------

हिन्दुस्थान समाचार / बिशाल


 rajesh pande