पाकिम, ०२ नोभेम्बर (हि.स.)। सिक्किम साहसिक पर्यटन महोत्सव २०२६ अन्तर्गत सञ्चालन भइरहेको रिले साहसिक पर्यटन प्याकेजको एक हिस्साका रूपमा पाकिम जिल्लाका विभिन्न निर्धारित स्थानमा प्याराग्लाइडिङ गतिविधि आयोजना गरियो। यसले सहभागीहरूलाई सिक्किमका मनोरम प्राकृतिक दृश्यबीच आकाशबाट साहसिक यात्राको रोमाञ्चक अनुभव प्रदान गरेको छ।
देशका विभिन्न भागबाट आएका २० जना सहभागी पहिलो चरणको यात्रामा गान्तोकबाट हेलिकप्टरमार्फत ग्रिनफिल्ड पाकिम विमानस्थल पुगे। हेलिकप्टर यात्राका क्रममा उनीहरूले हिमाली भूभागका मनोरम दृश्यहरू अवलोकन गर्ने अवसर पाए।
विमानस्थलमा पुगेपछि सहभागीहरूलाई प्याराग्लाइडिङका लागि निर्धारित थुम्की डाँडा लगियो। त्यहाँ आवश्यक उपकरण तथा सुरक्षा प्रबन्धसहित प्याराग्लाइडिङ उडान सञ्चालन गरियो।
आकाशमा साहसिक उडानको अनुभव लिएपछि सहभागीहरू रोडाथाङमा अवतरण गरे। त्यसपछि उनीहरूलाई सुरक्षित रूपमा रम्फू पुर्याइयो, जहाँ उनीहरूले नदीमा राफ्टिङ गर्नेछन्। त्यसपश्चात् उनीहरू नाम्ची जिल्लाको नामथाङस्थित लिङ्खिमटारमा रहेको महोत्सवको मुख्य स्थलमा पुगेर विभिन्न साहसिक गतिविधि तथा आकर्षणहरूको अनुभव लिनेछन्।
सिक्किम सरकारको पर्यटन तथा नागरिक उड्डयन विभागद्वारा आयोजित सिक्किम साहसिक पर्यटन महोत्सव २०२६ १ देखि ७ नोभेम्बरसम्म नाम्ची जिल्लाको नामथाङस्थित लिङ्खिमटारमा सञ्चालन भइरहेको छ। महोत्सवमा हवाई, स्थल तथा जलमा आधारित विभिन्न साहसिक गतिविधिहरू समावेश गरिएका छन्।
हिन्दुस्थान समाचार / बिशाल
