वासिङ्टन, ०७ नोभेम्बर (हि.स.)। इरानको परमाणु कार्यक्रमबारे गोप्य जानकारी प्राप्त गर्न अमेरिकाले ठूलो पुरस्कारको घोषणा गरेको छ। अमेरिकी सरकारले इरानको परमाणु कार्यक्रमसँग सम्बन्धित महत्त्वपूर्ण सूचना उपलब्ध गराउने व्यक्तिलाई २० मिलियन अमेरिकी डलर अर्थात् करिब १६६ करोड भारतीय रुपियाँ पुरस्कार दिने प्रस्ताव गरेको छ। आवश्यक परे सूचना दिने व्यक्तिलाई सुरक्षित स्थानमा पुनर्वासको अवसरसमेत उपलब्ध गराउन सकिने बताइएको छ। अमेरिकी केन्द्रिय कमान्ड (सेन्टकम) ले शुक्रबार यसबारे जानकारी दिएको हो।

बङ्गलादेशको अङ्ग्रेजी दैनिक पत्रिका ‘द डेली स्टार’ का अनुसार, सेन्टकमले सामाजिक सञ्जाल एक्समार्फत अमेरिकी विदेश मन्त्रालयको ‘रिवार्ड्स फर जस्टिस’ कार्यक्रमले इरानको परमाणु कार्यक्रमसँग सम्बन्धित महत्त्वपूर्ण सूचना खोजिरहेको जनाएको छ। यसमा परमाणु केन्द्र, उपकरण, गतिविधि तथा परमाणु वैज्ञानिकलगायत यससँग सम्बन्धित व्यक्तिहरूबारे जानकारी समावेश छन्।

अमेरिकी विदेश मन्त्रालयका अनुसार, यस कार्यक्रमको उद्देश्य अमेरिकाको राष्ट्रिय सुरक्षा तथा नागरिकहरूको हित संरक्षणमा सहयोग पुग्ने सूचना प्राप्त गर्नु हो। यो पुरस्कार कार्यक्रम सन् १९८४ मा स

शुरु गरिएको थियो।

अमेरिकाले अन्तरराष्ट्रिय परमाणु ऊर्जा एजेन्सी (आईएईए) का सुरक्षा मापदण्ड इरानले पालना नगरेका कारण एजेन्सीसँग इरानका सेन्ट्रिफ्युजजस्ता महत्त्वपूर्ण उपकरणको उत्पादन तथा भण्डारणबारे निरन्तर निगरानी गर्न आवश्यक जानकारी उपलब्ध नरहेको पनि जनाएको छ।

यद्यपि, २० मिलियन डलर पुरस्कार प्राप्त गर्न कस्तो स्तरको सूचना आवश्यक पर्ने हो भन्नेबारे अमेरिकी प्रशासनले स्पष्ट पारेको छैन।

यसैबीच, अमेरिकी राष्ट्रपति डोनाल्ड ट्रम्पले इरान युद्ध अन्त्य गर्न सम्झौता गर्न इच्छुक रहेको दाबी पुनः गरेका छन्। शुक्रबार राति फ्लोरिडाको वेस्ट पाम बिचमा उनले अमेरिकाले इरानको परमाणु कार्यक्रममाथि आक्रमण नगरेको भए इजरायलको अस्तित्व नै खतरामा पर्न सक्ने बताएका थिए।

ट्रम्पले भने, “हामी अहिले उनीहरूसँग वार्तामा छौँ। उनीहरू निकै व्यग्रताका साथ सम्झौता गर्न चाहन्छन्।” उनले अमेरिकी सैन्य कारबाहीले इरानको परमाणु कार्यक्रमलाई ठूलो क्षति पुर्‍याएको दाबीसमेत गरे।

अर्कोतर्फ, इरानका राष्ट्रपति मसुद पेजेस्कियानले पनि यसै साता आफ्नो सरकारले वार्तामार्फत सङ्कटको समाधान खोज्ने प्रयास गरिरहेको बताएका थिए। युद्ध पुनः शुरु हुन सक्ने आशङ्काबीच अन्तरराष्ट्रिय मध्यस्थकर्ताहरूले कूटनीतिक प्रयासलाई तीव्र बनाइरहेका छन्।

यसअघि ट्रम्पले मध्य इरानमा रहेको शङ्कास्पद परमाणु केन्द्र ‘पिकएक्स माउन्टेन’ को पनि उल्लेख गरेका थिए। यद्यपि, इरानले उक्त स्थानमा कुनै परमाणु सुविधा रहेको दाबी अस्वीकार गर्दै आएको छ।

हिन्दुस्थान समाचार / बिशाल