इस्लामाबाद (पाकिस्तान), 08 नोभेम्बर (हि.स.)। पाकिस्तानका सङ्घीय सूचना मन्त्री अताउल्लाह तरारमाथि निर्वाचन आचारसंहिता उल्लङ्घन गरेको आरोप लागेको छ। यस विषयमा पाकिस्तानको निर्वाचन आयोगले शनिबार संज्ञान लिएको छ।

आयोगद्वारा जारी विज्ञप्तिअनुसार, तरारले शनिबार एनए ७७ गुजराँवालामा हुन लागेको उपनिर्वाचनको प्रचारप्रसारका क्रममा आचारसंहिता उल्लङ्घन गरेका हुन्। उनले हेलिकप्टरमार्फत निर्वाचन क्षेत्रको भ्रमण गर्नुका साथै राष्ट्रिय सभाको एनए ७७ (गुजराँवाला १) क्षेत्रबाट उम्मेदवार बनेका राशिद बशीर विर्कको पक्षमा आयोजित चुनावी सभालाई सम्बोधन गरेका थिए।

‘डन’ समाचारपत्रका अनुसार, निर्वाचन आयोगले सङ्घीय मन्त्रीलगायत सार्वजनिक पद धारण गरेका व्यक्तिलाई चुनावी प्रचारप्रसारमा सहभागी हुन रोक लगाउने आचारसंहिताको प्रावधान उल्लङ्घन भएको जनाएको छ। आयोगले घटनाको छानबिनका लागि जिल्ला निगरानी अधिकारी र जिल्ला निर्वाचन अधिकारीसँग प्रतिवेदन माग गरेको छ। साथै, मन्त्री तरारलाई व्यक्तिगत रूपमा आयोगसमक्ष उपस्थित हुन निर्देशन दिएको छ।

आयोगले यस विषयमा अन्तिम निर्णय नभएसम्म सम्बन्धित निर्वाचन क्षेत्रको चुनावी परिणाम रोक्न सकिने पनि जनाएको छ।

एनए ७७ र पञ्जाब विधानसभा निर्वाचन क्षेत्र पीपी २०३ (साहीवाल ६) मा आज उपनिर्वाचन हुँदैछ। पाकिस्तान मुस्लिम लिग नवाज (पीएमएल एन) का सांसद तथा विधायकहरूको निधनपछि यी दुवै स्थान रिक्त भएका थिए।

एनए ७७ सिट महमूद बशीर विर्कको निधनपछि रिक्त भएको हो। लामो समयदेखि बिरामी रहेका उनको गत ११ सेप्टेम्बरमा निधन भएको थियो। उक्त क्षेत्रमा उनका छोरा राशिद बशीर विर्क चुनावी प्रतिस्पर्धामा छन्।

महमूद विर्कले आफ्नो राजनीतिक जीवनमा पीएमएल एनका उम्मेदवारका रूपमा पाँच पटक राष्ट्रिय सभाको निर्वाचन जितेका थिए। उनलाई पूर्वप्रधानमन्त्री नवाज शरीफका कट्टर समर्थकका रूपमा चिनिन्थ्यो। यस निर्वाचन क्षेत्रमा राशिदसहित अन्य १७ जना उम्मेदवारले मनोनयनपत्र दर्ता गराएका छन्।

हिन्दुस्थान समाचार / बिशाल