गान्तोक, 25 मार्च (हि.स.)। राज्यका मुख्य सचिव आर. तेलाङले दिसम्बर 2025 मा आयोजित मुख्य सचिवहरूको पाँचौं राष्ट्रिय सम्मेलनको राज्यस्तरीय अनुगमन बैठकको अध्यक्षता गरे। टाशीलिङ सचिवालयको सम्मेलन हलमा आज आयोजित उक्त बैठकमा नीति आयोगद्वारा 26-27 दिसम्बर, 2025 मा नयाँ दिल्लीमा आयोजना गरिएको 'विकसित भारत 2047 को लागि मानव पूँजी विकास' विषयमा केन्द्रित राष्ट्रिय सम्मेलनको परिणामबारे छलफल गरियो।
मुख्य सचिवले उक्त बैठकबारे जानकारी गराउॅंदै समीक्षा गर्नुपर्ने कार्य बुँदाहरूको बारेमा अवगत गराए। त्यसपछि, राज्य सरकारका विभिन्न विभागीय प्रमुखहरू र अधिकारीहरूसँग विस्तृत समीक्षा र छलफल गरियो। बैठकमा विभिन्न योजना र रणनीतिहरूको कार्यान्वयनको वर्तमान स्थितिको मूल्याङ्कन गरियो, साथै केन्द्र र राज्य प्राथमिकताहरूलाई मिलाउन अन्तर्निहित चुनौतीहरू पहिचान गरियो।
बैठकमा समग्र शासन र क्षमता निर्माण, नियमनमुक्ति र व्यवसाय गर्न सहजता, प्रारम्भिक बाल्यकाल हेरचाह र शिक्षा, विद्यालय शिक्षा र आधारभूत सिकाई, उच्च शिक्षा र ज्ञान अर्थतन्त्र, सीप र कार्यबल तयारी, पर्यटन र सम्पदा संरक्षण, खेलकुद र युवा स्वयंसेवा, र डिजिटल कृषिबारे सम्बन्धित विभागहरूसँग छलफल गरियो।
मुख्य सचिवले निर्धारित कार्यक्षेत्रभन्दा बाहिर सोच्न सबैलाई आग्रह गरे। उनले सम्बन्धित विभागहरूलाई समन्वयमा काम गर्न र राज्यको समावेशी विकास सुनिश्चित गर्न आवश्यक सुधारहरूमा ध्यान केन्द्रित गर्न कार्य योजनाहरू बनाउन निर्देशन दिए।
हिन्दुस्थान समाचार / बिशाल
