गेजिङ, 25 अप्रेल (हि.स.)। विश्व ब्याङ्कको टोली तथा ‘सिक्किम इन्स्पायर्स’ कार्यक्रम अन्तर्गत परियोजना व्यवस्थापन एकाइका अधिकारीहरूले २४ देखि २५ अप्रेल, 2026 सम्म गेजिङ जिल्लास्थित कञ्चनजङ्घा राष्ट्रिय निकुञ्ज (केएनपी) क्षेत्रभित्र रहेका परियोजना स्थलहरूको भ्रमण गरेका छन्। विश्व ब्याङ्क टोलीको अगुवाई गरेकी भेरेना फिप्स एबेलरले ‘सिक्किम इन्स्पायर्स’ की कार्यक्रम निर्देशक रोहिणी प्रधानको सहभागितामा युनेस्कोद्वारा विश्व सम्पदा सूचीमा सूचीकृत कञ्चनजङ्घा राष्ट्रिय निकुञ्ज अन्तर्गत जोंग्री-गोचेला पदमार्ग आसपासका परियोजना स्थलहरूको अवलोकन गर्यो।
भ्रमणका क्रममा टोलीले सोही पदमार्ग हुँदै साचेन शिविरसम्म पदयात्रा गर्दै त्यहाँ रात बिताएको थियो र सञ्चालनमा रहेका विभिन्न परियोजना स्थलहरूको निरीक्षण गरेको थियो। कञ्चनजङ्घा राष्ट्रिय निकुञ्जकी प्रभागीय वन अधिकृत भूमिका राईले निकुञ्ज क्षेत्रमा भइरहेका विकासात्मक गतिविधिहरूबारे टोलीलाई जानकारी गराइन्।
‘सिक्किम इन्स्पायर्स’ कार्यक्रम सिक्किम सरकारको पहल हो, जसलाई विश्व ब्याङ्कले सहयोग गरिरहेको छ। यस कार्यक्रमको उद्देश्य विशेषगरी महिला तथा युवाहरूको आर्थिक सशक्तीकरण गर्दै राज्यको आर्थिक विकासलाई प्रोत्साहन गर्नु हो। यस अन्तर्गत सामुदायिक पर्यटन प्रवर्द्धन, डिजिटल प्रविधिमार्फत बजार व्यवस्थापन तालिम, गैर-कृषि क्षेत्रका उद्यमशीलता विकास तथा आधारभूत पूर्वाधार सुदृढीकरणका कार्यहरू सञ्चालन गरिँदै आएका छन्।
दुई दिने भ्रमणका क्रममा टोलीले पदमार्ग आसपासका स्थानीय बासिन्दा, पर्यटनसँग सम्बन्धित सरोकारवाला तथा उद्यमशीलता विकास कक्षका सदस्यहरूसँग अन्तरक्रिया गर्दै ‘सिक्किम इन्स्पायर्स’ कार्यक्रममार्फत जीविकोपार्जन र आर्थिक विकासका लागि उपलब्ध गराइएका सहयोगबारे जानकारी लिएको थियो। टोलीले पक्षी अवलोकन कार्यक्रममा पनि सहभागिता जनाएको थियो।
---------------
हिन्दुस्थान समाचार / बिशाल
