गान्तोक, 18 जुलाई (हि.स.)। सिक्किम प्रदेश कांग्रेस समितिका अध्यक्ष गोपाल छेत्रीले जन्तर-मन्तरबाट पर्यावरणवीद् सोनाम वाङचुकलाई कथित जबरजस्ती अस्पताल लगिएकोमा तीव्र निन्दा गरेका छन्। यस घटनाले लोकतन्त्र र भारतको संविधानमा विश्वास गर्ने प्रत्येक नागरिकलाई स्तब्ध र विचलित बनाएको उनले बताएका छन्।

प्रदेश कांग्रेस अध्यक्ष छेत्रीले घटनाको निन्दा गर्दै शिक्षा, पर्यावरण संरक्षण र राष्ट्र निर्माणमा आफ्नो जीवन समर्पित गर्ने एक व्यक्तिसॅंग एक अपराधी जस्तो व्यवहार गरिएको बताएका छन्। उनले यदि अधिकारीहरूले चिकित्सा सल्लाह र न्यायिक निर्देशनहरू अनुसार उनको स्वास्थ्यको रक्षा गर्न साँच्चै काम गरिरहेका थिए भने सम्पूर्ण प्रक्रिया पारदर्शी, सम्मानजनक र मर्यादाका साथ सम्पन्न गरिनुपर्थ्यो भनी बताएका छन्।

उनले जन्तर मन्तरमा आज भएको घटना केवल एक व्यक्ति विरुद्धको कारबाही मात्र नभई यसलाई लोकतन्त्रको भावनामा गम्भीर प्रहार ठहर गरेका छन्। उनले भने, 'जब शान्तिपूर्ण आवाजलाई संवादको सट्टा बल प्रयोग गरिन्छ, लोकतन्त्र आफैं कमजोर हुन्छ। शान्तिपूर्ण असहमतिलाई दबाउनु लोकतन्त्रको पहिचान होइन, तर संवैधानिक मूल्यमान्यताहरूलाई बेवास्ता गरिएको चिन्ताजनक संकेत हो।'

उनले सोनाम वाङचुकले शिक्षा, नवप्रवर्तन, पर्यावरण संरक्षण र हिमालय क्षेत्रमा बसोबास गर्ने मानिसहरूको कल्याणमा आफ्नो योगदान मार्फत राष्ट्रलाई ठूलो गौरव दिलाएको उल्लेख गरेका छन्। उनले भारत सरकारलाई लोकतान्त्रिक मूल्यमान्यतालाई कायम राख्न, प्रत्येक नागरिकको मर्यादाको सम्मान गर्न र संविधानद्वारा ग्यारेन्टी गरिएका अधिकारहरू डर वा पक्षपात बिना सुरक्षित छन् भन्ने सुनिश्चित गर्न आह्वान गरेका छन्।

हिन्दुस्थान समाचार / बिशाल