गान्तोक, 21 जुलाई (हि.स.)। सिक्किमका राज्यपाल ओमप्रकाश माथुरले आज दक्षिण सिक्किमको नाम्ची जिल्लाअन्तर्गत समरदुङ क्षेत्रको भ्रमण गरी टिस्टा स्टेज-6 जलविद्युत् परियोजनाको निर्माणाधीन सुरुङमा भएको दुःखद घटनास्थलको स्थलगत निरीक्षण गरे। उनले घटनास्थलमै पुगेर उद्धार तथा राहत कार्यको वास्तविक अवस्थाबारे विस्तृत समीक्षा गरे। यस अवसरमा मुख्यमन्त्री प्रेमसिंह तामाङ पनि घटनास्थलमा उपस्थित थिए।
लोकभवनले प्राप्त जानकारीको आधारमा भनेको छ, दक्षिण सिक्किमको समारदुङस्थित एनएचपीसी टिस्टा स्टेज-6 जलविद्युत् परियोजनाको निर्माणाधीन सुरुङभित्र हिजो शङ्कास्पद मिथेन ग्यास अचानक विस्फोट हुँदा सुरुङभित्र बाक्लो धुवाँ तथा विषालु ग्यास फैलिएको थियो।
उद्धार कार्यमा जिल्ला प्रशासन, नेशनल डिजास्टर रेस्पोन्स फोर्स (एनडीआरएफ), स्टेट डिजास्टर रेस्पोन्स फोर्स (एसडीआरएफ), स्थानीय प्रशासन, सिक्किम पुलिस, इन्डिया रिजर्भ बटालियन (आईआरबी) तथा अन्य आपत्कालीन निकायहरू निरन्तर समन्वयका साथ खटिएका छन्।
जिल्ला प्रशासनको रिपोर्ट अनुसार, हालसम्म सुरुङभित्रबाट १० जनाको शव निकालिएको छ। साथै, अझै केही श्रमिक तथा अधिकारीहरू सुरुङभित्र फसेको आशंका रहेको र उनीहरूको सुरक्षित उद्धारका लागि युद्धस्तरमा प्रयास जारी रहेको छ।
राज्यपालले यस संवेदनशील अवस्थालाई ध्यानमा राख्दै आपदा प्रबन्धनसँग सम्बन्धित सबै निकायलाई राहत तथा उद्धार कार्यमा पूर्ण तत्परताका साथ लाग्न आग्रह गरेको छ, ताकि प्रभावितहरूसम्म यथाशीघ्र सहायता पुग्न सकोस्। साथै, उनले घाइतेहरूको उपचारमा कुनै कमी हुन नदिन तथा सबै प्रभावितलाई आवश्यक स्वास्थ्य सेवा उपलब्ध गराउन प्रशासनलाई निर्देशन दिएका छन्।
यस दुःखद घटनाप्रति गहिरो शोक व्यक्त गर्दै राज्यपालले अहिलेको समयमा सबै एकजुट भएर प्रभावित परिवारहरूको साथमा उभिनुपर्ने आवश्यकता रहेको बताएका छन्। उनले दिवंगत आत्माहरूको चिरशान्तिको कामना गर्दै सुरुङभित्र फसेकाहरूको सकुशल उद्धार तथा घाइतेहरूको शीघ्र स्वास्थ्यलाभको कामना गरेका छन्।
---------------
हिन्दुस्थान समाचार / बिशाल
