महोबा, 26 जुलाई (हि.स.)। उत्तर प्रदेशमा महोबा जिल्लाको पनवाड़ी पुलिस थाना क्षेत्र अन्तर्गत बिजरारी गाउँमा एक जना व्यक्तिले आफ्नो आठ महिनाकी गर्भवती पत्नीको हसियाले प्रहार गरी हत्या गऱ्यो। घटनापछि अभियुक्तले पुलिसलाई बहकाएर अज्ञात व्यक्तिलाई हत्याको आरोप लगायो तर अभियुक्तको छोराले नै पिताको कार्यलाई पुलिस समक्ष उजागर गऱ्यो। पुलिसले अभियुक्त पतिलाई पक्राउ गरेको छ र घटनाको अनुसन्धान शुरु गरेको छ।

शनिवार राति हनीफ आफ्नी पत्नी मनिषा मन्सुरी (25) र दुई सन्तानसँग जिल्लाको पनवाड़ी क्षेत्रको बिजरारी गाउँमा बस्दै आएको थियो। शनिवार राति उ नशाको अवस्थामा घर पुग्यो र आफ्नी पत्नीसँग झगड़ा गर्न थाल्यो। जब मनिषाले विरोध गरिन्, क्रोधित हनीफले आफ्नो धैर्य गुमायो र नजिकै राखिएको धारिलो हंसियाले उनको टाउको र घाँटीमा धेरै चोटि प्रहार गऱ्यो, जसले गर्दा गर्भवती पत्नीको मृत्यु भयो।

अपराध गरेपछि अभियुक्त आफैले पुलिसलाई बोलाएर कुनै अज्ञात व्यक्तिले हत्या गरेको कथा बनाउन खोज्यो। तर उसको निर्दोष 5 वर्षीय छोराले आफ्नो पिताले आफ्नी आमाको हत्या गरेको रहस्यको पर्दाफास गऱ्यो। उक्त घटनाले उक्त क्षेत्रमा खैलाबैला मच्चाएको छ।

कुलपहाड़ सर्कल अफिसर अनुराधा कुमारले आइतवार बताइन्, अभियुक्तले डायल 112 मा फोनमा आफ्नी पत्नीको हत्याको जानकारी दिएको थियो। अनुसन्धानमा उसले आफ्नै पत्नीको धारिलो हतियारले हत्या गरेको खुलासा भएको छ। पञ्चनामा भरिएपछि मृतकको शव पोस्टमार्टमका लागि पठाइएको छ। अभियुक्तलाई पक्राउ गरिएको छ र सोधपुछ भइरहेको छ।

हिन्दुस्थान समाचार / भवानी थामी