नयाँ दिल्ली, 15 अगस्त (हि.स.)। प्रधानमन्त्री नरेन्द्र मोदीले आज बिहान स्वतन्त्रता दिवसको अवसरमा सबैभन्दा पहिला देशवासीलाई शुभकामना दिएका छन्। उनको सन्देश लाल किल्लामा पुग्नुअघि एक्स ह्यान्डलमा जारी गरिएको छ।
प्रधानमन्त्रीले भने, सबै देशवासीलाई स्वतन्त्रता दिवसको शुभकामना। यो राष्ट्रिय पर्वले हामीलाई देशका वीर योद्धाहरूको अद्भुत साहस, अथक सङ्घर्ष र मातृभूमिप्रति अतुलनीय समर्पणको सम्झना गराउँछ। उनका आदर्शहरू अपनाएर विकसित भारतको संकल्पलाई साकार गरौँ।
लाल किल्लामा हुने मुख्य राजकीय समारोहको अनुमानित तालिकाअनुसार प्रधानमन्त्री मोदीको लाहौरी गेटमा आगमन बिहान 7ः15 बजीतिर हुनेछ। यसभन्दा पहिले रक्षा मन्त्रालयका सबै अधिकारी आउनेछन्। उनी आइपुग्नुअघि रक्षामन्त्री राजनाथ सिंह पनि उपस्थित हुनेछन्। यस अवसरमा चिफ अफ डिफेन्स स्टाफ (सिडिएस) जनरल एनएस राजा सुब्रमण्यम, सेना, वायुसेना र नौसेनाका प्रमुखहरू पनि उपस्थित हुनेछन्। हरेक वर्ष जस्तै यस वर्ष पनि रक्षा मन्त्रालयले समारोहलाई स्मरणीय बनाउन लाल किल्लाको सजावटमा त्रिरङ्गाको रङ भएका फुलहरू प्रयोग गरेको छ।
प्रधानमन्त्री मोदीले राष्ट्रिय राजधानी दिल्लीमा 80औँ स्वतन्त्रता दिवसको मुख्य समारोहमा लाल किल्लाको प्राचीरबाट पनि सम्बोधन गर्नेछन्। आफ्नो आवासबाट प्रस्थान भएपछि उनले राष्ट्रिय युद्ध स्मारकको भ्रमण गर्नेछन्। शहीद सैनिकहरूलाई श्रद्धाञ्जलि अर्पण गरेपछि उनी लाल किल्लामा हुने उत्सवमा सहभागी हुनेछन्। उनले लगातार 13औँ पटक लाल किल्लामा झण्डा फहराउनेछन्। प्रधानमन्त्री कार्यालयले भाषणका विषयवस्तुमा सुझाउ मागेको थियो। पहिलोपटक लाल किल्लामा आयोजित स्वतन्त्रता दिवस समारोहमा राष्ट्रगान-जन गण मनअघि राष्ट्रिय गीत-बन्दे मातरम गाइनेछ।
--------
हिन्दुस्थान समाचार / बिशाल
