भोपाल/धार, २५ अगस्त (हि.स.)। मध्य प्रदेशको धारस्थित ऐतिहासिक भोजशाला विवादलाई लिएर हिन्दू संगठनको आह्वानमा मंगलबार आधा दिन धार जिल्ला बन्द गरियो। हिन्दू संगठनका सदस्यहरू बिहानैदेखि सडकमा उत्रिएर व्यापारीहरूलाई आफ्ना व्यापारिक प्रतिष्ठान बन्द राख्न आग्रह गरेका थिए। बन्दका क्रममा अत्यावश्यक सेवाहरूलाई भने छुट दिइएको थियो। सम्भावित अप्रिय घटनालाई ध्यानमा राख्दै प्रशासनले संवेदनशील क्षेत्रमा ठूलो संख्यामा सुरक्षाकर्मी परिचालन गरेको थियो।

बन्दका क्रममा धार शहरका प्रमुख बजार तथा व्यापारिक क्षेत्रमा बिहानैदेखि अधिकांश पसलहरू पूर्ण रूपमा बन्द रहेका थिए। दैनिक गतिविधिको तुलनामा बजारमा सुनसान देखिएको थियो। हिन्दू संगठनसँग आबद्ध सदस्यहरू विभिन्न बजार तथा व्यावसायिक क्षेत्रमा पुगेर पसल बन्द गरी विरोध प्रदर्शनमा सहयोग गर्न व्यापारीहरूसँग आग्रह गरेका थिए।

आम नागरिकको सुविधालाई ध्यानमा राख्दै विद्यालय, कलेज, पेट्रोल पम्प, औषधि पसल तथा अन्य अत्यावश्यक सेवाहरूलाई बन्दबाट बाहिर राखिएको थियो।

हिन्दू संगठनहरूले भोजशाला मामिलामा अदालतको स्पष्ट निर्देशन हुँदाहुँदै पनि स्थानीय प्रशासनले त्यसको उचित कार्यान्वयन नगरेको आरोप लगाएका छन्। विरोधको मुख्य कारण भोजशालानजिक प्रत्येक शुक्रबार हुने जुमाको नमाजको व्यवस्था रहेको उनीहरूको भनाइ छ। हिन्दू संगठनहरूले उक्त व्यवस्था तत्काल अन्त्य गर्न माग गरेका छन्।

सर्वोच्च अदालतको अन्तरिम आदेशअनुसार स्थानीय प्रशासनले भोजशालाको पछाडि रहेको खसरा नम्बर ६१२ को भूमिमा शुक्रबार मुस्लिम समुदायका लागि नमाज पढ्ने व्यवस्था सुनिश्चित गरेको छ। उक्त व्यवस्थाप्रति हिन्दू समुदायले कडा आपत्ति जनाउँदै आएको छ।

सुरक्षा व्यवस्था कडा

जिल्ला बन्द तथा विरोध प्रदर्शनको संवेदनशीलतालाई ध्यानमा राख्दै पुलिस र प्रशासन पूर्ण रूपमा सतर्क अवस्थामा रहेका थिए। शहरका प्रमुख चोक, बजार तथा संवेदनशील क्षेत्रमा ठूलो संख्यामा पुलिस परिचालन गरिएको थियो। प्रशासनिक अधिकारीहरूले निरन्तर गस्ती गर्दै शान्ति तथा कानून व्यवस्था कायम राख्न स्थितिमाथि निगरानी गरिरहेका थिए।

हिन्दुस्थान समाचार / भवानी थामी