गान्तोक, १४ सेप्टेम्बर (हि.स.)। सिक्किम भारोत्तोलन संघको पहिलो बैठक सोमबार सम्पन्न भएको छ। बैठकमा राज्यमा भारोत्तोलन खेलको विकास तथा प्रवर्द्धनका साथै आगामी दिनमा सिक्किमबाट राष्ट्रिय तथा अन्तरराष्ट्रिय स्तरका खेलाडी उत्पादन गर्ने विषयमा विस्तृत छलफल गरियो।

बैठकले सिक्किमका सबै जिल्लामा पुगेर प्रतिभाशाली भारोत्तोलकहरूको पहिचान गरी उनीहरूलाई प्रशिक्षण प्रदान गर्ने र प्रतियोगिताका लागि तयार पार्ने निर्णय गरेको छ। साथै, यस वर्षको अन्त्यतिर राज्यस्तरीय भारोत्तोलन प्रतियोगिता आयोजना गर्ने निर्णयसमेत गरिएको छ।

बैठकमा सिक्किम भारोत्तोलन संघका अध्यक्ष तथा सिम्फेडका सल्लाहकार आनन्द लामा, उपाध्यक्षहरू एचएस योञ्जन र रञ्जित शर्मा, महासचिव तथा राज्य खेल विकास बोर्डका अध्यक्ष रिन्जिङ वाङ्ग्याल छोपेल, संयुक्त सचिव छेवाङ रिन्जिङ भोटिया, कोषाध्यक्ष निमा डोमा तामाङ, प्रचार सचिव छेवाङ टाशी छोपेल भोटिया तथा सहायक कोषाध्यक्ष सीबी दोङको सहभागिता रहेको थियो।

बैठकले खेल तथा युवा मामिला विभागका निर्देशक डा. आरबी विश्वकर्मालाई सल्लाहकार तथा पेमा दोर्जी भोटियालाई प्राविधिक निर्देशक नियुक्त गरेको छ। त्यसैगरी महेन्द्र ढकाल, रिचिला भोटिया, छेवाङ भोटिया, लुमा तामाङ र सृजना क्षेत्रीलाई कार्यकारी सदस्यमा नियुक्त गरिएको छ।

हिन्दुस्थान समाचार / बिशाल