गान्तोक, १७ सेप्टेम्बर (हि.स.)। सिक्किमका राज्यपाल ओमप्रकाश माथुरको विशेष पहलमा राज्यको चिकित्सा तथा शिक्षा क्षेत्रलाई सुदृढ बनाउन आज दुईवटा एम्बुलेन्स प्रदान गरिएको छ। प्रधानमन्त्री नरेन्द्र मोदीको जन्मदिन तथा ‘स्वच्छता नै सेवा’ सेवा पखवाडा अभियानको देशव्यापी शुभारम्भको अवसरमा लोकभवन परिसरमा आयोजित विशेष कार्यक्रममा राज्यपाल माथुरले भारतीय स्टेट ब्याङ्कको संस्थागत सामाजिक उत्तरदायित्व कोषमार्फत सोरेङ प्राथमिक स्वास्थ्य केन्द्र र प्रधानमन्त्री श्री विद्यालयअन्तर्गतको कस्तुरबा गान्धी बालिका विद्यालयलाई एक-एकवटा एम्बुलेन्स प्रदान गरे।
कार्यक्रममा राज्यपाल माथुरले सोरेङ प्राथमिक स्वास्थ्य केन्द्रकी प्रमुख चिकित्सा अधिकारी डा. स्मृति राई तथा गेजिङका जिल्ला अधिकारी तेन्जिङ डी. डेन्जोङ्पालाई एम्बुलेन्सका चाबी हस्तान्तरण गरे।
यस अवसरमा राज्यपालले भने, “प्रधानमन्त्री नरेन्द्र मोदीको जन्मदिन तथा ‘स्वच्छता नै सेवा’ अभियानका क्रममा लोकभवन, सिक्किमको यो पहल सुदूर ग्रामीण क्षेत्रसम्म गुणस्तरीय चिकित्सा सेवा पुर्याउन र छोरीहरूको शिक्षाको मार्ग सहज बनाउन महत्वपूर्ण कदम हो। राज्यका प्रत्येक नागरिकको कल्याणका लागि स्वास्थ्य र शिक्षाको क्षेत्रलाई सशक्त बनाउनु हाम्रो संवैधानिक तथा नैतिक दायित्वअन्तर्गत सर्वोच्च प्राथमिकतामा रहनुपर्छ।”
राज्यपालको यस पहलबाट विशेषगरी ग्रामीण क्षेत्रमा स्वास्थ्य सेवा पहुँच विस्तार तथा बालिकाहरूको शिक्षालाई थप सहज बनाउन सहयोग पुग्ने अपेक्षा गरिएको छ।
हिन्दुस्थान समाचार / बिशाल
