नयाँ दिल्ली, १८ सेप्टेम्बर (हि.स.)। कांग्रेस नेता तथा लोकसभामा विपक्षी दलका नेता राहुल गान्धीको सामाजिक सञ्जाल पोस्टलाई लिएर भारतीय जनता पार्टी (भाजपा) ले शुक्रवार प्रतिक्रिया दिएको छ। भाजपा सांसद तथा राष्ट्रिय प्रवक्ता सुधांशु त्रिवेदीले राहुल गान्धीले भाजपा र निर्वाचन आयोगमाथि लगाएका आरोपको जवाफ दिँदै कांग्रेसबाट अलग भएर बनेका राजनीतिक दलहरूको इतिहासतर्फ ध्यानाकर्षण गराएका छन्।

भाजपा मुख्यालयमा आयोजित पत्रकार सम्मेलनमा त्रिवेदीले राहुल गान्धीले आफ्नो पोस्टमा शिवसेना, राष्ट्रवादी कांग्रेस पार्टी (एनसीपी) र तृणमूल कांग्रेसको उदाहरण दिँदै भाजपा र निर्वाचन आयोगमाथि राजनीतिक दल विभाजन गरेको आरोप लगाएको बताए। उनले यी दलहरूको गठन र कांग्रेससँगको सम्बन्धको राजनीतिक इतिहासबारे राहुल गान्धीले जानकारी लिनुपर्ने बताए।

त्रिवेदी अनुसार, राष्ट्रवादी कांग्रेस पार्टीको गठन शरद पवारले सन् १९९९ मा कांग्रेसबाट अलग भएपछि गरेका थिए। त्यसैगरी ममता ब्यानर्जीले सन् १९९७ मा कांग्रेसबाट अलग भएर तृणमूल कांग्रेस गठन गरेकी थिइन्। उनले तृणमूल कांग्रेसको उदयपछि पश्चिम बंगालमा कांग्रेसको राजनीतिक प्रभाव कमजोर भएको दाबी गरे।

भाजपा नेताले राजनीतिक दलहरूको इतिहास र तिनको गठनका परिस्थितिलाई नबुझी अर्को दलमाथि आरोप लगाउनु उचित नहुने बताए। उनले कांग्रेसबाट अलग भएर बनेका दलहरूको उदाहरण दिँदै भाजपामाथि प्रश्न उठाउनु कांग्रेसकै राजनीतिक इतिहाससँग जोड़िएको विषय भएको तर्क गरे।

उल्लेख्य, राहुल गान्धीले शुक्रवार सामाजिक सञ्जालमा गरेको पोस्टमा शिवसेना, एनसीपी र तृणमूल कांग्रेसको उल्लेख गर्दै भाजपा र निर्वाचन आयोगले विपक्षी दलहरूलाई विभाजित गर्ने र त्यसपछि उनीहरूको निर्वाचन चिह्न खोस्ने गरेको आरोप लगाएका थिए।

यो प्रतिक्रिया पश्चिम बंगालमा तृणमूल कांग्रेसको नाम र निर्वाचन चिह्नसम्बन्धी विवादबीच आएको हो। निर्वाचन आयोगले १७ सेप्टेम्बरमा अन्तरिम आदेश जारी गर्दै विवाद समाधान नभएसम्म तृणमूल कांग्रेसका प्रतिस्पर्धी दुवै समूहलाई पार्टीको नाम र ‘फूल तथा घाँस’ निर्वाचन चिह्न प्रयोग गर्न रोक लगाएको छ।

हिन्दुस्थान समाचार / भवानी थामी