गान्तोक, २४ सेप्टेम्बर (हि.स.)। सिक्किम सरकारको आयुष विभागले ‘स्वस्थ भोलिका लागि आयुर्वेद’ थीममा ११औँ आयुर्वेद दिवसको अवसरमा बुधवार राज्यस्तरीय निरन्तर चिकित्सा शिक्षा कार्यक्रम आयोजना गऱ्यो। कार्यक्रममा आयुष विभागअन्तर्गत सिक्किमका विभिन्न स्थानबाट आएका आयुष चिकित्सकहरूको सहभागिता रहेको थियो।
विभागकी सचिव सुचित्र रसाइलीले आयुष विभाग एक अलग विभागका रूपमा स्थापना भएको एक वर्षभन्दा केही बढी समय मात्र भएको भए पनि यस अवधिमा विभिन्न महत्वपूर्ण संस्थागत पहलहरू अघि बढाइएको बताइन्। उनले विशेष रूपमा भारतीय चिकित्सा प्रणालीका लागि आयुष परिषद् गठन, समर्पित आयुष सेवासम्बन्धी कर्मचारी संरचना स्थापना गर्ने प्रक्रिया अघि बढिरहेको उल्लेख गरिन्। यी पहलहरूले सिक्किममा आयुष क्षेत्रको व्यावसायिक विकास तथा संस्थागत सुदृढीकरणमा महत्वपूर्ण गति प्रदान गरेको उनले बताइन्।
आफ्नो सम्बोधनमा आयुष विभागका सल्लाहकार तथा कार्यक्रमका मुख्य अतिथि एके घतानीले ११औँ आयुर्वेद दिवसको अवसरमा विभागलाई बधाई दिँदै स्वस्थ भोलिको शुरुआत आज गरिने स्वस्थ छनोट र अभ्यासबाट हुने बताए। उनले राज्यमा आयुष क्षेत्रलाई सुदृढ बनाउन निरन्तर सहयोग र दूरदृष्टिका लागि सिक्किमका मुख्यमन्त्रीप्रति आभार व्यक्त गरे। उनले आयुष विभागलाई सुदृढ बनाउन तथा विभिन्न आयुषसम्बन्धी पहललाई अघि बढाउन आयुष विभागका मन्त्री जीटी ढुङ्गेलले प्रदान गरेको मार्गदर्शन र सहयोगको पनि प्रशंसा गरे।
उनले रोगको रोकथाममा आधारित स्वास्थ्य सेवा, स्वस्थ आहार, सन्तुलित दैनिक दिनचर्या, शारीरिक गतिविधि तथा समग्र स्वास्थ्य र कल्याणको महत्त्वमा जोड दिए। आयुर्वेदका सिद्धान्तलाई चिकित्सकीय क्षेत्रमा मात्र नभई घर, विद्यालय, कार्यस्थल तथा समुदायमा समेत प्रवर्द्धन गर्नुपर्ने उनले बताए।
कार्यक्रममा डा. मिलन प्रधानलाई किर्गिस्तानमा आयोजित वर्ल्ड स्ट्रेन्थ लिफ्टिङ तथा आईबीपी च्याम्पियनसिपमा दुई रजत पदक जितेर राज्यको गौरव बढाएकोमा सम्मान गरियो।
हिन्दुस्थान समाचार / बिशाल
