मदुरै, २८ सेप्टेम्बर (हि.स.)। तमिलनाडुका मुख्यमन्त्री विजयले सोमवार मदुरै स्थित सरकारी राजाजी अस्पतालमा ‘तायमामन स्वर्ण औंठी योजना’ को शुभारम्भ गरेका छन्। योजना अन्तर्गत राज्यका सरकारी अस्पताल तथा सरकारी प्राथमिक स्वास्थ्य केन्द्रमा जन्मिने नवजात शिशुलाई सरकारका तर्फबाट एक ग्राम सुनको औंठी प्रदान गरिनेछ।

कार्यक्रमको शुरूआत तमिल थाई वाज्थुसित भयो। यस क्रममा मुख्यमन्त्री विजयले नवजात शिशुलाई आफ्नै हातले सुनको औंठी लगाइदिए। केही आमाहरूले आफ्ना शिशुलाई मुख्यमन्त्रीको काखमा दिएर उनीसँग सेल्फी लिए। मुख्यमन्त्रीले पनि शिशुलाई काखमा लिएर माया गर्दै औंठी लगाइदिए।

सरकारले यस योजनाका लागि चालू आर्थिक वर्षमा ७५५.८३ करोड रुपियाँ बजेट विनियोजन गरेको छ। पहिलो चरणमा १ लाख २८ हजार सुनका औंठी खरिद गरिएको छ। योजनाको पहिलो चरण २८ सेप्टेम्बरदेखि शुरु भएर १४ नोभेम्बरसम्म सञ्चालन हुनेछ। यस अवधि २२ जून २०२६ देखि राज्यका सरकारी अस्पताल तथा प्राथमिक स्वास्थ्य केन्द्रमा जन्मिएका योग्य नवजात शिशुलाई एक ग्राम सुनको औंठी प्रदान गरिनेछ।

योजना अन्तर्गत आगामी ४० दिनसम्म दैनिक दुई समयमा औंठी वितरण गरिनेछ। बिहान १० बजीदेखि दिउँसो १ बजीसम्म तथा दिउँसो २ बजीदेखि बेलुका ४ बजीसम्म वितरण हुनेछ। भीड़ व्यवस्थापनका लागि प्रत्येक केन्द्रमा दैनिक अधिकतम ५० लाभग्राहीलाई औंठी प्रदान गर्ने व्यवस्था गरिएको छ। यसमध्ये बिहान २५ र दिउँसो २५ लाभग्राही रहनेछन्।

राज्य सरकार अनुसार, २८ सेप्टेम्बरपछि जन्मिने शिशुलाई सम्बन्धित सरकारी अस्पतालमै प्रसूतिको क्रममा वा निर्धारित प्रक्रिया अनुसार ‘तायमामन स्वर्ण औंठी योजना’ को लाभ प्रदान गरिनेछ। सरकारी अस्पतालमा प्रसूति गराउन प्रोत्साहित गर्ने, नवजात शिशुको जन्मलाई उत्सवका रूपमा मनाउने तथा सरकारी स्वास्थ्य सेवाप्रति जनविश्वास बलियो बनाउने उद्देश्यले योजना सञ्चालन गरिएको सरकारको भनाइ छ।

कार्यक्रमपछि मुख्यमन्त्री विजयले मदुरै जिल्लाको कलेक्टर कार्यालय रोडमा पुनर्निर्माण गरिएको गान्धी संग्रहालयको उद्घाटन गर्नेछन्। त्यसपछि उनले मदुरैको प्रसिद्ध मीनाक्षी अम्मन मन्दिरमा पूजाअर्चना गर्नेछन्। मन्दिरमा १७ सेप्टेम्बरमा कुम्भाभिषेक सम्पन्न भएको थियो।

हिन्दुस्थान समाचार / भवानी थामी